ಹಠವೇಕೆ ನಿನಗೆ?

ಆಗಸದೆ ಚಂದ್ರನ ನನಗೆ
ತೋರಿಸುವ ಹಠವಾದರೂ ಏಕೆ ನಿನಗೆ?
ನಿನ್ನ ಕಣ್ಣಲ್ಲೇ ಇಣುಕಿ
ಚಂದ್ರನ ಬಿಂಬವನ್ನು ನೋಡುವ ಆಸೆಯೆನಗೆ.

ಮಾತಾಡದೆ ಮೌನದಲ್ಲೇ ಎಲ್ಲ ಹೇಳುತ್ತಿದ್ದವ ನೀನು
ಮಾತಾಡಿ ಮನವೊಲಿಸುವ ಹಠವಾದರೂ ಏಕೆ ನಿನಗೆ ?
ನಿನ್ನ ಮೌನದ ಆಳದಲ್ಲಿಳಿದು ನಿನ್ನ ಮನವನರಿಯಲು ಹೋಗಿ
ಮಾತುಗಳೇ ಮರೆತು ಹೋಗಿವೆಯೆನಗೆ.

ಕಣ್ಮನಗಳಲಿ ಕನಸುಗಳ ಬೀಜ ಬಿತ್ತಿದವ ನೀನು
ಮುಚ್ಚಿದ ನನ್ನ ಕಣ್ಣುಗಳನು ತೆರೆಸುವ ಹಠವಾದರೂ ಏಕೆ ನಿನಗೆ ?
ಬೆಳಗಿರಲಿ ಇರುಳಿರಲಿ ನಿನ್ನ ಕೈ ಬಿಡೆ ಹಿಡಿದು
ಕನಸಿನೂರಲ್ಲಿ ಕಳೆದು ಹೋಗುವ ಆಸೆಯೆನಗೆ.