ಭೂಮಿ-ಮುಗಿಲು

ಉರಿವ ಬಿಸಿಲಲಿ ಕಾದು ಕಾದು
ಹಸಿರೆಲ್ಲ ಒಣಗಿ ವಿರಹಿಣಿಯಂತೆ
ಕಾಣುತ್ತಿದ್ದ ಇಳೆಯು
ಒಮ್ಮಿಂದೊಮ್ಮೆ ಆಗಸದಲ್ಲಿ
ಮುಗಿಲು ಕಟ್ಟಲು, ತಂಗಾಳಿ ಬೀಸಲು
ಯಾರನ್ನೋ ಬರಮಾಡಿಕೊಳ್ಳಲು
ಸಿದ್ಧವಾದಂತೆ ಕಂಡಳು
ಮನದಿ ಮೂಡಿತು ಶಂಕೆಯು
ಮುಗಿಲು ಭೂಮಿಯ ಪ್ರೇಮಿಯೇ?

ತಂಗಾಳಿ ಬೀಸಿ ಬೀಸಿದಾಗಲೆಲ್ಲ
ಮೊದಲ ಮಳೆ ಹನಿಗಳ ಸಿಂಚನ
ಅಹುದೆ ಭೂಮಿಗೆ ಮುಗಿಲಿನ ಚುಂಬನ?
ಮತ್ತೆ ಮೂಡಿತು ಶಂಕೆಯು
ಮುಗಿಲು ಭೂಮಿಯ ಪ್ರೇಮಿಯೇ?

ಭೂಮಿ ಹೊದ್ದಳು ಹಸಿರಿನುಡುಗೆಯ
ಮುಡಿಯ ತುಂಬೆಲ್ಲ ಹೂವೇ ಹೂವು
ಮುಗಿಲ ಕಾಣಲು ತವಕಗೊಂಡಳೇ?
ನವ ವಧುವಿನಲಂಕಾರದಲ್ಲಿ ನಾಚಿ ನುಲಿದಳೆ?
ತಿಳಿಗಾಳಿ ಬೀಸಿ ಹಸಿರು ಹುಲ್ಲುಗಳು
ತೂಗಿ ಸೀರೆ ನೆರಿಗೆಯಂತೆ ಚಿಮ್ಮಿದಾಗ
ಮುಗಿಲು ಮೆಚ್ಚಿ ಮನಸೋತನೆ?
ಮತ್ತೆ ಮೂಡಿತು ಶಂಕೆಯು
ಮುಗಿಲು ಭೂಮಿಯ ಪ್ರೇಮಿಯೇ?

ಹರಿವ ನೀರಿನ ಜುಳು ಜುಳು
ಅಹುದೆ ಅವಳ ನಗುವಿನ ಕಿಲ ಕಿಲ?
ಅವಳ ನಗುವ ಕದ್ದು ನೋಡಲು
ಮುಗಿಲು ಬಂದನೇ ಮೆಲ್ಲಗೆ?
ಭುವಿಯ ಕೆನ್ನೆಯೆಲ್ಲ ಕೆಂಪು ಕೆಂಪು
ಕಳ್ಳನವನು, ಅವಳ ಕೆನ್ನೆ
ಚಿವುಟಿದನೆ ಸುಮ್ಮಗೆ?
ಮತ್ತೆ ಮೂಡಿತು ಶಂಕೆಯು
ಮುಗಿಲು ಭೂಮಿಯ ಪ್ರೇಮಿಯೇ?

ಕಂಗೊಳಿಸುತಿರುವ ತರು ಲತೆಗಳು
ಹೌದೇ ಅವಳ ಮದುವೆಯ ತೋರಣ?
ಕಪ್ಪೆಯೋಲಗ, ಇರುವೆ ದಿಬ್ಬಣ
ಎಲ್ಲೆಲ್ಲೂ ಕಳೆಗಟ್ಟುತಿದೆ ಸಂಭ್ರಮ
ಗುಡುಗು ಸಿಡಿಲುಗಳ ಮಂತ್ರ ಘೋಷದ ನಡುವೆ
ಕರಗಿ ಸುರಿಯಿತು ಮುಗಿಲದು
ವರ್ಷಧಾರೆಯ ತಂಪು ಇಳೆಯ ತಬ್ಬಲು
ಮನವು ಉಸುರಿತು ಸುಮ್ಮನೇ
ಇಂದು ಭೂಮಿ ಮುಗಿಲಿನ ಮಿಲನವೆ?